A plataforma dixital para un consumo responsable, KAPURA, e un traballo sobre a transparencia en sustentabilidade en Galicia foron os dous gañadores desta primeira edición, na que participaron un total de 26 traballos das tres universidades públicas galegas. A entrega de premios tivo lugar esta mañá no Reitorado da UDC, coincidindo co Día Internacional do Medio Ambiente. Os traballos recoñecidos contan cunha dotación económica de 2.000 euros.
A Cátedra Vegalsa-Eroski UDC de Compromiso social, Comunicación e Reputación corporativa anunciou o gañador da primeira edición do "Premio Cátedra Vegalsa-Eroski UDC ao mellor Traballo Fin de Mestrado (TFM)”, que recaeu no proxecto KAPURA da Universidade da Coruña, de Daniel Alejandro Castrillón Cano, Alejandra Ceballos, Francisca Pacheco e Sara Silvar). O segundo premio foi outorgado ao traballo “Rendición de contas e transparencia en materia de sustentabilidade en Galicia. Tendencias e perspectivas. Ano 2022” da Universidade de Vigo, de Anahi Iglesias Gualati.