Tras o éxito de edicións anteriores, a Cátedra Epifanio Campo da Universidade da Coruña convoca os III Premios de Investigación Epifanio Campo, en homenaxe a un pioneiro no ámbito da economía circular e a xestión ambiental  [Enlace ao formulario de inscrición].

Epifanio Campo foi o fundador do Grupo Rodonita, impulsor desta cátedra, cuxo obxectivo fundamental é fomentar a investigación, a formación e a divulgación no ámbito do medioambiente, a sustentabilidade e a xestión de residuos. Nesta liña, a finalidade dos Premios de Investigación Epifanio Campo é impulsar e premiar a investigación relacionada coa xestión e valorización dos residuos xerados pola actividade industrial, como parte dunha economía circular que apoie a protección do medioambiente. Admitiranse proxectos realizados a nivel individual ou grupal, en calquera das súas etapas de execución (proposta, desenvolvemento, finalización), e valorarase a orixinalidade do proxecto, así como o seu impacto, aplicabilidade, relevancia e innovación na protección do medioambiente e na xestión e valorización dos residuos industriais. Tamén se valorará a presentación do proxecto que os solicitantes realizarán durante unha xornada que organizará a Cátedra Epifanio unha vez concluído o prazo de presentación de solicitudes. Esta xornada servirá de encontro para os distintos grupos de investigación da Universidade da Coruña no ámbito do medioambiente, a sustentabilidade e a xestión de residuos, dando unha maior visibilidade ás súas investigacións, e finalizará co acto de entrega dos III Premios de Investigación Epifanio Campo.

​

Destinatarios

Os participantes nesta convocatoria deberán estar incluídos no Catálogo de Investigación da Universidade da Coruña, como membros dalgún grupo de investigación ou como investigadores individuais, na data en que acaba o prazo de recepción de solicitudes da presente convocatoria. Tamén poderán participar os estudantes matriculados no curso 2024-2025 en programas de doutoramento ou en traballos fin de grao ou #máster da Universidade da Coruña que realizasen tarefas de investigación asociadas a ese proxecto, sempre que vaian acompañados de polo menos outro solicitante que estea incluído no Catálogo de Investigación da Universidade da Coruña, na data en que acaba o prazo de recepción de solicitudes da presente convocatoria. En caso de participación grupal, todos os membros do grupo solicitante deben cumprir os requisitos, aínda que poden pertencer a distintos grupos de investigación dos recolleitos no Catálogo de Investigación da Universidade da Coruña.

​

Premios

Outorgaranse un primeiro premio dotado con 6.000 euros e un segundo premio de 4.000 euros.

​

Datas importantes

O prazo de recepción de solicitudes termina o 24 de outubro de 2025.

O fallo do xurado farase público e comunicarase aos participantes ao final da xornada de presentación dos proxectos candidatos.

​

Información e documentación

Bases dos III Premios de Investigación Epifanio Campo (prazo ampliado)

Acceso ao formulario de inscrición e envío do primeiro proxecto de investigación (A cubrir polo investigador individual ou por unha persoa de contacto do grupo solicitante).

Acceso ao formulario de inscrición e envío do segundo proxecto de investigación (A cubrir só no caso de que ese mesmo investigador individual ou persoa de contacto do grupo solicitante desexe presentar un segundo proxecto).

Para calquera dúbida ou consulta relacionada coas bases desta convocatoria dirixirse a catedra.epifaniocampo@udc.es

Para calquera dúbida ou consulta relacionada co procedemento de inscrición dirixirse a belen.pazos@udc.es