A Escola Politécnica de Enxeñaría de Ferrol (EPEF) e o Centro de Tratamento de Residuos Industriais de Galicia (CTRIG) acollen, do 17 ao 23 de xullo, de 09:00 a 14:00 horas, unha formación dirixida ao estudantado universitario e a profesionais do ámbito industrial. O curso será impartido por un bo número de profesionais do sector vinculados a SOGARISA e máis por persoal docente e investigador da Universidad de Huelva (UHU) e máis da Universidade da Coruña (UDC).

Un ano máis, a Escola Politécnica de Enxeñaría de Ferrol (EPEF) e o Centro de Tratamento de Residuos Industriais de Galicia (CTRIG), situado no Concello das Somozas e xestionado por SOGARISA, acollen o “Curso de Xestor/a de Residuos: a actividade profesional verde”, do 17 ao 23 de xullo, en horario de 9:00 a 14:00 horas, da man da Cátedra Epifanio Campo que promove a Universidade da Coruña (UDC) xunto co Grupo Rodonita.

Ao igual que en anteriores edicións, o Campus Industrial de Ferrol acolle unha formación dirixida a todas aquelas persoas que queiran adquirir unha competencia profesional básica no eido da xestión dos residuos industriais, poñendo o foco no estudantado e titulados e tituladas universitarias, así como nos profesionais do ámbito industrial que queiran iniciarse ou afondar nesta temática. Os contidos teñen un enfoque eminentemente práctico, tendo en conta tanto a perspectiva profesional da xestión de residuos autorizado como a de calquera industria xeradora de residuos.

O curso será impartido por profesionais do sector vinculados a SOGARISA e máis por persoal docente e investigador da Universidad de Huelva e máis da Universidade da Coruña. O denominado “emprego verde” é unha das saídas profesionais con mellores perspectivas de futuro. As súas áreas de actuación son amplas e variadas, dentro das que se inclúe a figura do xestor de residuos para levar a cabo de forma adecuada a recollida e transporte, almacenamento, tratamento, valorización e/ou eliminación dos materiais refugados que producen as actividades industriais.

As persoas interesadas en participar neste curso formativo teñen ata o 22 de xuño para formalizar a súa inscrición. O prezo da matrícula para o alumnado dalgún dos títulos oficiais da UDC é de 75 euros. A tarifa para o público xeral ascende a 100 euros. Máis información enviando un correo electrónico a catedra.epifaniocampo@udc.es.

Impulsada pola Universidade da Coruña (UDC) e polo Grupo Rodonita

No ano 2019, a Universidade da Coruña e o Grupo Rodonita poñen en marcha a Cátedra Epifanio Campo, adscrita á Escola Politécnica de Enxeñaría de Ferrol e dirixida pola profesora Maripaz Mateo. O seu ámbito de actuación é o medio ambiente, a xestión de residuos e a sustentabilidade. Os obxectivos da cátedra céntranse en promocionar todo tipo de actividades de formación, divulgación, investigación e transferencia de coñecemento, relacionadas coa xestión medioambiental.