A Cátedra HM-UDC colaborou no evento de presentación do libro “Camino da inclusión”, realizado por ANHIDACORUÑA (Asociación de Nenos con Déficit de Atención con/sen Hiperactividade). O acto tivo lugar o xoves 21 de setembro na Sede Afundación e contou coa participación de Marcelo Castelo Rivas, comunicador diverxente con TDAH, e Javier Cudeiro Mazaira, especialista en Neurofisioloxía e Catedrático de Fisioloxía da UDC.
O libro ten a intención de axudar, acompañar e reducir o medo das persoas que sofren o trastorno por déficit de atención con ou sen hiperactividade, aos seus familiares e ao seu profesorado. Aborda os últimos estudos científicos sobre o trastorno, así como os cambios lexislativos que se produciron nos últimos anos en España sobre a atención á diversidade, ademais de introducir relatos de familiares e ilustrar o día a día de nenas e nenos con TDAH.