Dado que a subministración accesible de enerxía eléctrica nos fogares é unha necesidade humana básica para unha vida digna, convén abrir o debate sobre o papel que poden desempeñar as entidades locais na atención a esta necesidade, nun escenario de crecente encarecemento da electricidade por mor da invasión rusa de Ucraína e da transición enerxética cara a combustibles non fósiles.

Con este obxectivo, a Cátedra de Dereito Local da UDC celebra o próximo 13 de xaneiro a xornada “As políticas enerxéticas das entidades locais: novos escenarios” na Facultade de Dereito na Universidade da Coruña. 

Abordaranse as posibles políticas públicas no ámbito do municipalismo, como o estímulo da eficiencia enerxética a través de ordenanzas locais, a contratación pública e a política fiscal, ata a produción e a comercialización eléctrica, pasando polo impulso das comunidades enerxéticas.

A xornada está dirixida polo coordinador da Cátedra, Carlos Alberto Amoedo Souto, e comezará ás 9:45 horas no Salón de Graos da Facultade de Dereito. Aínda que é de acceso libre, require inscrición previa a través da ligazón (preme aquí).

A xornada comezará ás 9:45h coa presentación, comezando a primeira intervención o profesor de Dereito Administrativo da UNED, ex conselleiro de sectores regulados da CNMC, conselleiro da CNMV, Mariano Bacigalupo Saggese, baixo o título “O papel dá iniciativa pública na produción e comercialización de enerxía”; a continuación intervén a catedrática de Dereito Administrativo da Universidade de Málaga, Isabel González Rios coa conferencia titulada “As competencias das entidades locais en materia enerxética” e como última intervención dá maña contamos coa catedrática de Dereito Administrativo e secretaria xeral da UCLM, Isabel Gallego Córcoles, coa conferencia titulada "Comunidades de enerxía e entidades locais".

Pola tarde haberá unha mesa redonda sobre sobre as experiencias locais de produción e/o comercialización de enerxía eléctrica, onde participan a directora da Axencia de Enerxía de Barcelona, Cristina Castells; a presidenta do primeiro consello reitor de Som Enerxía, funcionaria do Servizo Provincial de Industria de Zaragoza, Ana Marco; o membro da cooperativa Ecooo (Madrid), Mario Sánchez e o Alcalde de Muras, Manuel Requeijo.