Cátedra Luis Fernández Somoza

PRESENTACIÓN

A Cátedra de internacionalización de Estudos Luis Fernández Somoza enmárcase dentro da idea de proxectar aos nosos estudantes e profesores internacionalmente, así como á recepción de personalidades académicas de prestixio, que aporten unha visión ampla na realidade complexa da globalización económica.

A formación dos economistas, tanto profesores coma estudantes, esixe unha adecuación á competencia internacional e á flexibilidade na adaptación a novos mercados e novos produtos, nunha economía cada vez máis transnacional. A planificación estratéxica da Facultade de Economía e empresa da Universidade da Coruña contempla este feito e a Cátedra pretende proxectalo como un elemento máis do programa.

A Cátedra estrutúrase a través dunha comisión de seguimento, que ten entre os seus obxectivos a mobilidade de profesores e estudantes, así como a presenza internacional da facultade a través de novos convenios de dobres titulacións de grao, mestrado ou doutoramento con outras facultades de economía e empresa internacionais e localizadas como estratéxicas. Así mesmo, promoveranse ciclos de conferencias con académicos de relevancia internacional e outras actividades de transferencia de coñecemento e tecnoloxía.

Dende aquí, invitamos tanto aos estudantes como ao profesorado a enriquecer a súa formación a través da internacionalización dos seus coñecementos e capacidades, a sabendas de que este é o camiño correcto para mellorar o benestar da nosa Economía e a satisfacción dos seus profesionais.

A recepción de profesorado de outros países supón para nós o eixe da relación con outros centros, polo que lles invitamos a contactar con nós neste proxecto, coa seguridade de que o intercambio de coñecementos será frutífero para ambos e permitiranos achegar máis as nosas economías e aos nosos profesionais.

Manuel Alberto Gómez Suárez
Director da Cátedra de Internacionalización Luis Fernández Somoza

NOVAS